Памятаеце, мы пісалі, што новы аўтавакзал часткова будзе беларускамоўным (шыльды і стэнды)? Дык вось учора стала вядома, што па-беларуску будуць агучваць інфармацыю пра адпраўленне і прыбыццё транспарту, — паведаміў «Дзедзіч».
Пра гэта рашэнне распавяла Дар’я Намятава, каардынатар ініцыятывы «Аўтавакзал па-беларуску». Кіраўніцтва аўтавакзала плануе зрабіць агучванне адпраўлення і прыбыцця транспарту на беларускай мове. Рэйсы, якія накіроўваюцца ў замежныя гарады, будуць дадаткова агучвацца яшчэ на ангельскай.
Начальнік аддзела арганізацыі перавозак ААТ «Брэстаблаўтатранс» Барыс Калінін паведаміў, што ініцыятыву аб беларусізацыі “сэрца” міжгародніх і міжнародных перавозак падтрымаў і старшыня Берасцейскага гарвыканкама Аляксандр Рагачук.
Ініцыятыву «Аўтавакзал па-беларуску» рэалізавала Агенцтва рэгіянальнага развіцця «Дзедзіч» у межах кампаніі «Наша мова». Подпісы збіраліся і анлайн праз сайт petitions.by, і ўжывую ў Дзень роднай мовы 21 лютага.
